خوست (پژواک، ١٥ وږى ٩٩): د ملي امنيت سلاکار وايي، دښمن غواړي چې افغانستان د يو دايمي او قوي نظام څښتن نه وي؛ ځکه نو د نظام ړنګول غواړي.
حمدالله محب دغه څرګندونې نن (د وږي ١٥مه) خوست ولايت ته د سفر پر مهال له ځايي چارواکو، قومي مشرانو او نورو خلکو سره د بېلابېلو ليدنو پر مهال کړې دي.
د ملي امنيت شورا وياند جاوېد فيصل پژواک اژانس ته وويل چې خوست ته له رسېدو سره سم حمدالله محب د ياد ولایت له ملکي او نظامي مسولينو سره پر امنیتي وضعیت ناسته وکړه.
د خوست والي صديق پتمن او امنيتي مسوولينو په دې ناسته کې وویل چې د دغه ولایت امنيتي حالت د نورو سیمو په نسبت بهتر دی او د امنیتي ځواکونو ترمنځ ښه همغږي او بېساری ولسي ملاتړ د دې لامل شوی چې ټولې سیمې له دښمنه وساتل شي او خلکو ته د ارام ژوند زمینه برابره شي.
هغوی د تشکيلاتو زياتوالی او د امنيتي نهادونو لا تقويت او تجهيز د خپلو اساسي غوښتنو په توګه يادې کړې.
د ملي امنيت سلاکار د امنیتي ځواکونو او ولس ترمنځ همغږي وستایله او زیاته یې کړه چې د دښمن د تشخیص او د دښمنۍ د عمده دلایلو د محوې لپاره دې نور کار وشي.
هغه یادونه وکړه چې د ولایتي ادارې د ستونزو د حل لپاره به په مرکز کې کار کېږي، خو ځایي مسوولین یې تشویق کړل چې په ولسي کچه نورې هڅې هم وکړي.
د ملي امنيت سلاکار ډاکټر حمدالله محب او ورسره پلاوي يې دغه راز له علماوو، ولایتي شورا غړو، قومي مشرانو، ښځو، ځوانانو او مدني ټولنې له استازو سره ناسته وکړه او د هغوی ستونزې او غوښتنې يې واورېدې.
د خوست ولایت د علماوو مشر مولوي شاه محمود وویل، د هېواد په تصمیم ګیرۍ کې دې علماوو ته صلاحیت ورکړل شي او ورته توجه وشي.
د خوست ولایت د ښځو، ځوانانو، قومي مشرانو او مدني ټولنې استازو وویل، که دولت د جنګ ختمول غواړي نو اړینه ده چې د کارموندنې په برخه کې جدي توجه وکړي؛ ځکه بېکاري د جنګ د بقا باعث ګرځي.
د ملي امنیت سلاکار ژمنه وکړه چې د خوست د خلکو ټولې ستونزې به له ولسمشر سره له نږدې شريکې کړي او ورته رسېدنه به وشي.
هغه وويل، د هېواد او خوست تاریخي ځایونو ته د ولسمشر او حکومت ځانکړې توجه ده؛ ځکه دښمن د تاریخ په محوې سره غواړي نوی نسل او ځوانان ګمراه کړي څو هغوی ته د تخریب لپاره د ځوانانو د جذب زمينه برابره شي.
login or register a new account.
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن