د پژواک خدمتونه

د انځورونو څانګه

غږيزه څانګه

د ولس غږ کلتوري پروګرامونه

د ټاکنو خبري پوښښ

د کانونو په اړه ځانګړې پاڼه

Afghan Peace Process Special Page

د پژواک د سوداګريزو اعلانونو خدمتونه

Daily Newsletter

Language
Sending Time (GMT / Kabul time)

د پکتيا اوسيدونکي: د بندو او نيمګړو پروژو چارې دې ژر پيل شي

ټولنه

ارشیف

د پکتيا اوسيدونکي: د بندو او نيمګړو پروژو چارې دې ژر پيل شي

Sep 27, 2020 - 20:42

 

ګردېز (پژواک، ۶ تله ۹۹): د پکتيا اوسيدونکي نيوکه کوي چې د ډېر وخت په تېرېدو د ولسمشرغني او ځینو نورو لوړ پوړو چارواکو لخوا د ځينو ژمنه شويو پروژو چارې تر اوسه نه دي پيل شوې او يا نيمګړې پاتې دي.

دوی د تلې په ۶مه، په یوه خبري غونډې پر مهال ژر تر ژره د دې پروژو د چارو د پيل غوښتنه وکړه او ويې ويل که دې برخه کې جدي اقدام ونه شي، لاريونونه او نور مدني اعتراضونه به پيل کړي.

د پکتيا د قومونو يووالي ټولنيزې شورا مرستيال محمدعلي جان محمدي وویل، چې د ژمنو سربېره ګردېز ښار تر دمه هېڅ ماسټر پلان نلري، چې په خبره يې د خواشيني او شرم خبره ده.

محمدي وويل:((د ګردېز ښار لپاره د سردارمحمد داود خان د وخت ماسټر پلان تطبيق شوی، نور څوک کار نه شي کولی، وايي له کومې مخې کار وکړو؟ ګردېز تر اوسه جامع ښاري پلان نه لري؛ همدارنګه په ښار کې ځينو کسانو د دوه سړکونو تېرېدو مخه نيولې، غوښتنه مو دا ده چې جدي توجه ورته وشي.))

مدني فعال جمعه ګل افغان نيوکه وکړه چې ولسمشر غني پکتيا ته د سفر پر مهال د سوېل ختيځ زون په مرکز ګردېز کې د ۳۰۰ بستريز روغتون جوړېدو ژمنه کړې وه، خو د شاوخوا دوه نيم کلونو په تېرېدو تر اوسه په دې اړه هېڅ عملي ګام نه دی اخيستل شوی.

افغان وايي:((لکه څنګه چې د ولسمشر د ژمنې سربېره ۳۰۰ بستريز روغتون ورک دی، همدارنګه د کليو پرمختيا وزارت په چوکاټ کې د اقرا برنامې لخوا ۱۰۳ مکتبونو ته د ودانيو جوړولو د چارو درک هم نشته، په داسې حال کې چې وزيران راغلل او دا برنامه يې ګردېز کې افتتاح کړه.))

د منګلو يووالي ټولنيزې شورا مشر فيصل منګل د ګردېز لرغوني بالاحصار ناوړه حالت په اړه سخته اندېښنه وښوده او ويې ويل چې د دې بالاحصار سروې شوې، خو د شاوخوا پنځه مياشتو په تېرېدو يې د بيارغونې چارې نه دي پيل شوې.

منګل زياته کړه:((ګردېز بالاحصار په ډېر ناوړه حالت کې دی او سختې توجه ته اړتيا لري؛ همدارنګه زموږ غوښتنه دا ده چې په ملي پارک د ځاځي اريوب نومولو ژمنه دې جدي تعقيب شي.))

د لويې پکتيا فرهنګي ټولنې مشر او د خبري غونډې تنظيموونکی سيدجمال الدين اصف خېل په دې ولايت کې د کرنې په برخه کې د ګڼو سړخونو او مچلغو کرنيز بند د چارو د خراب کيفيت په اړه اندېښنه وښوده او ويې ويل چې د شاوخوا پنځه مياشتو په تېرېدو په احمدابا ولسوالي کې د کمپلکس سړخونې چارې ندي پيل شوې.

اصف خېل وایي، چې د دې سربېره د ولسمشر د ژمنو له ډلې د ګردېز ښار پنځه امنيتي حوزو ته ودانۍ نه دي جوړې شوې، په ګردېز کې د ورزشکارانو لپاره د جوړېدونکي جمنازيم چارې په ټپه ولاړې دي او د ښځو لپاره د سوداګريز او اقتصادي مارکېټ د جوړېدو هېڅ کار نه دی شوی.

نوموړي زياته کړه:((د ګردېز ــ روحاني بابا، څمکني ــ جانيخېل، احمدخېل ــ ځاځي اريوب، احمدابا ولسوالي ــ مچغلو، سيدکرم ــ لجه منګل سړکونو جوړېدو او د ګردېز ــ ډنډپټان ټرانزيټي سړک ترميم هېڅ کار نه دی شوی. همدارنګه ولسمشر ژمنه کړې چې پکتيا به په اقتصادي زون بدلوي او د دې مهمې او لويې چارې لپاره به ځينې پروژې پلې کړي، خو له بده مرغه تر اوسه هېڅ هم نشته.))

خو د پکتيا والي محمد حليم فدايي وايي چې يادې ټولې پروژې يې په عملياتي پلان کې شامل او له مسولو ادارو سره شريکې کړې دي.

فدايي پژواک ته وويل:((د اقرا برنامې لخوا د ۱۰۳ مکتبونو کارونه به ژر پيل شي، د ګردېز ــ ډنډپټان ترانزيټي لارې لپاره مو هم له مرکزه هيئت راغوښتی، همدارنګه نورې پروژې مو هم شريکې او تعقيب کړې دي. پوره هڅه مو دا ده چې د بندو پروژو چارې پيل او نيمګړې هم بشپړې شي.))

دا په داسې حال کې ده چې پکتيا کې د سوړ ژمي له امله هم شاوخوا څلور مياشتې رغنيزې چارې نه تر سره کيږي.

نښه: 

ورته راپورونه:

نظر ورکړئ

اعلانونه

Advertisement

Etisalat Get more data, Etisalat Afghanistan