د پژواک خدمتونه

د انځورونو څانګه

غږيزه څانګه

د ولس غږ کلتوري پروګرامونه

د ټاکنو خبري پوښښ

د کانونو په اړه ځانګړې پاڼه

Afghan Peace Process Special Page

د پژواک د سوداګريزو اعلانونو خدمتونه

Daily Newsletter

Language
Sending Time (GMT / Kabul time)

د بلخ ليکوالو او فرهنګيانو د کاپي رايټ قانون پلي کېدو غوښتنه وکړه

د بلخ ليکوالو او فرهنګيانو د کاپي رايټ قانون پلي کېدو غوښتنه وکړه

Sep 28, 2020 - 16:11

مزارشريف (پژواک، ۷ تله ۹۹): د بلخ ولايت يو شمېر ليکوالان او فرهنګيان له حکومته د کاپي رايټ قانون پلي کېدو غوښتنه کوي.

دوی وايي، سره له دې چې ياد قانون د اجرا وړ دی، خو بيا هم د مسوولو ادارو له خوا د کاپي رايټ موضوع جدي نه نيول کېږي.

بلخي ليکوالانو دغه څرګندونې د تلې په ۷مه د کتابونو په هغه نندارتون کې وکړې چې د بلخ فرهنګي اوونۍ په وياړ جوړ شوی و.

ليکوال او شاعر عارف بسام پژواک ته وويل، لا هم په هېواد کې زيات شمېر کسان او حتی خپرندويه ټولنې د کاپي رايټ موضوع ته پاملرنه نه کوي.

هغه زياته کړه چې ډېری ليکوالان له همدې اړخه په اندېښنه کې دي او ان د ځينو يې له ليکوالۍ سره علاقه مندي هم کمه شوې ده.

بسام وويل: ((زه خپله څو څو ځلې له همدې مشکل سره مخ شوی وم، په يوه نشريه کې مې ليدلي چې زما ليکنه يې زما له اجازې او نوم پرته خپره کړې او په فېسبوک کې خو هره ورځ زما شعرونه، پرته له دې چې زما نوم ورسره وليکي خپروي، دا غير قانوني عمل دی.))

د بسام په خبره، حکومت بايد هغه قانون په جدي ډول پلی کړي چې د کاپي رايټ برخه کې جوړ شوی او ټولې قانوني پروسې يې طی کړې دي.

ليکوال او شاعر عطامحمد ساهو هم وايي چې د کاپي رايټ قانون نه پلي کېدا د کتابونو د چاپ برخه کې يو لړ ستونزې راپيدا کړې دي.

د هغه په خبره، ځيني کسان چې ځانونه ليکوالان بولي، له بېلابېلو کتابونو مطالب را اخلي او د ماخذونو له يادولو پرته يې په خپل نوم خپروي.

نوموړی وايي، که په دې برخه کې قانون په جدي ډول عملي کېدلای، نو تر ډېره به د کاپي رايټ مخه نيول شوې وای.

ساهو همدا راز د کاپي رايټ قانون په تړاو د عامه پوهاوي د زياتېدو غوښتنه هم کوي.

نوموړی وايي: ((سره له دې چې د کاپي رايټ د مخنيوي لپاره قانون موجود دی، خو لا هم زموږ ډېر شمېر ليکوالان او فرهنګيان په دې تړاو معلومات نه لري، په کار ده چې د دغه قانون په تړاو د عامه پوهاوي پروګرامونه جوړ کړای شي.))

هغه له ليکوالانو هم غواړي چې د کاپي رايټ قانون د نقض پر ليدو اړوندو ادارو ته مراجعه وکړي.

د بلخ د اطلاعاتو او کلتور رييس مطيع الرحمان کريمي پژواک سره خبرو کې د کاپي رايټ په تړاو د ليکوالانو او فرهنګيانو اندېښنې پر ځای وبللې، خو زياته يې کړه چې دوی د ياد قانون عملي کولو ته ژمن دي.

هغه زياته کړه چې هر څوک د کاپي رايټ په موضوع کې متهم وپېژندل شي؛ نو دوی به ورسره جدي قانوني چلند وکړي.

کريمي وويل: ((ما څو ورځې وړاندې د بلخ له يو شمېر ليکوالانو او د کتاب ناشرانو سره ځانګړې ناسته درلوده، هغوی ته مې په زغرده وويل چې د کاپي رايټ قانون د نقض په صورت کې به قانوني چلند ورسره وکړم.))

د هغه په وينا، د هر ليکوال يا شاعر اثر او مطالب که د بل چا له خوا له اجازې پرته خپاره شوي يا چاپ شوي وي، نو دوی ته دې مراجعه وکړي چې له متهم شخص سره جدي چلند وشي.

د بلخ ليکوالان او فرهنګيان پر داسې مهال د کاپي رايټ قانون پلي کېدو غوښتنه لري چې په مزارشريف ښار کې د بلخ فرهنګي اوونۍ په وياړ د کتابونو يو لوی نندارتون هم جوړ شوی دی.

د ياد نندارتون يوه جوړوونکې مينه سليمي وايي چې د پښتو، دري او ازبکي ژبو سلګونه کتابونه يې د نندارې او خرڅلاو لپاره ايښي دي.

هغه زياته کړه چې له دې کار څخه موخه يې له کتاب او مطالعې سره د خلکو او په ځانګړي ډول د ځوانانو پخلاينه ده.

نوموړې له ځوانانو غواړي چې د ټولنيزو رسنيو د زياتو کارونو او ګيم بازۍ پر ځای دې  د کتاب مطالعې ته هم وخت ورکړي.

د بلخ د اطلاعاتو او کلتور رياست مسوولين وايي چې د بلخ فرهنګي اوونۍ په لړ کې به، د انځورونو او کتابونو نندارتون، د مشاهيرو يادغونډې، سما رقص او بېلابېل، کلتوري، تفريحي، ادبي او فرهنګي پروګرامونه جوړ کړي. 

ورته راپورونه:

نظر ورکړئ

اعلانونه

Advertisement

Etisalat Get more data, Etisalat Afghanistan