د پژواک خدمتونه

د انځورونو څانګه

غږيزه څانګه

د ولس غږ کلتوري پروګرامونه

د ټاکنو خبري پوښښ

د کانونو په اړه ځانګړې پاڼه

Afghan Peace Process Special Page

د پژواک د سوداګريزو اعلانونو خدمتونه

Daily Newsletter

Language
Sending Time (GMT / Kabul time)

نادري : طالبانو سره خبرو کې لا هم اساسي بحث پر اوربند دى

نادري : طالبانو سره خبرو کې لا هم اساسي بحث پر اوربند دى

Sep 28, 2020 - 15:07

کابل(پژواک،۷ تله۹۹): د افغانستان دولت مرکچي پلاوی وايي، له طالبانو سره په خبرو کې اساسي بحث لا هم اوربند دی چې نن هم د طالبانو له کاري ډلې سره پرې خبرې لري.

دغه څرګندونې د افغانستان د مذاکره‌کوونکي پلاوي غړي او وياند نادر نادري له قطر څخه په يوه ويډيويي خبري کنفرانس کې وکړې.

هغه وويل:"هغه څه چې ډېر مهم دي او موږ لا هم پرې بحث کوو، دوه اساسي موضوعات دي چې له وخته مخکې د بحث مېز ته راوړل شوي او اړتيا ده چې يوه حل ته پرې ورسيږو چې په اړه به يې نن هم ناسته ولرو."

نادري وايي، د افغانستان د ارزښتونو ټولګې او شکل په اړه چې د نن او راتلونکې لپاره هويتي ارزښت لري که دا بحث ژر پای ته ورسيږي ترڅو پر بنسټیزو موضوعاتو باندې چې لومړی باید بحث وشي هغه اوربند دی او د جنګ درېدل دي ځکه د خلکو غوښتنه ده.

هغه زياته کړه، دوی له دې خبر دي چې د افغانستان خلک د خبرو ښې پایلې ته هيله مند دي له همدې امله همکاران یې دغه مسوولیت درکوي او په اړه یې مسوولانه هڅه کوي.

خو د افغانستان دسولې لپاره دامريکا ځانګړي استازي زلمي خليلزاد څو ورځې مخکې په يوه مرکه کې ويلي چې طالبان له افغان دولت سره تر بشپړ تړون مخکې اوربند ته نه چمتو کېږي.

ددې ترڅنګ طالبانو هم ويلي چې لومړى دوى پر نورو موضوعاتو خبرې کوي، څو اوربند ته لاره هواره شي.

بلخوا په ولسي جرګه کې د خلکو استازي د طالبانو په هغو شرایطو نیوکه کوي چې له امله یې د کړنلارې جوړېدو لپاره خبرې ځنډيږي.

د بدخشان د خلکو استازي ذبیع الله عتیق نن د جرګې عمومي غونډې ته وویل، طالبان داسې شرایط وړاندي کوي چې د پلي کېدو وړ نه دي.

دی وايي:"د طالبانو له خوا د سختو شرایطو وړاندې کول د خبرو ځنډولو په معنا دي ترڅو ډېره اراضي لاسته راوي چې امنیتي ځواکونه یې باید د تحرکاتو مخنیوی وکړي."

ولسي جرګه کې د کابل د خلکو استازي غلام حسین ناصري غونډې ته وویل چې طالبان غواړي د خبرو د کړنلارې ترتیبولو پر مهال داسې شرایط وړاندې کوي چې د هغوی پلي کول ناممکن او له اساسي قانون سره په ټکر کې دي.

د هغه په وینا، د داسې شرایط وړاندې کول چې ممکن نه وي؛ هېواد کې د سولې ټینګښت ته د دغې ډلې نه اراده ښيي او باید له داسې شرایطو چې د ملي ګټو خلاف وي، ډډه وکړي.

له څو ورځو ځنډ وروسته د افغانستان دولت او طالبانو د مذاکراتي پلاوو ویاندویانو تېر ماښام خبر ورکړ چې د دواړو لورو د اړيکو تماس ډلو د اختلافي موضوعاتو پر حل ګډه کاري ناسته کړې ده.

په قطر کې شاوخوا ١٥ ورځې مخکې د طالبانو او د افغانستان دولت د پلاوو ترمنځ د بين الافغاني مذاکراتو د پرانيستې رسمي غونډه ترسره شوه، چې له دغو مراسمو دوه ورځې وروسته د دواړو لورو ترمنځ يوه کاري کمېټه جوړه شوه، څو د مخامخ خبرو اترو لپاره پر طرزالعمل او اجنډا باندې موافقه وشي.

نښه: 

ورته راپورونه:

نظر ورکړئ

اعلانونه

Advertisement

Etisalat Get more data, Etisalat Afghanistan