کابل (پژواک، ۲۸ تله ۹۹): د ولسي جرګې رییس د ولسوالیو د قوماندانانو پر ټاکلو نیوکه کوي او وايي، د کابل د امنیت لپاره د امرالله صالح ګومارل امنیت نه ټينګېږي او « د (امنیتي تړون) ډېری غړي د مور او پلار عاق دي.»
کورنیو چارو وزارت د روان کال د زمري په ۲۴مه د «امنیتي تړون» پروګرام جوړول اعلان کړل او د هغه موخه یې د امنیت ښه ټينګښت او د خلکو د راټولېدو له لارې له جرمونو او جنایتونو سره مبارزه وبلله.
د ولسمشر لومړي مرستیال امرالله صالح په دې وروستیو کې ویلي چې د ولسمشر په لارښوونه د تلې له ۲۶مې وروسته د څو اوونیو لپاره په مستقیم ډول د کابل امنیتي مسایلو ته رسېدنه پر غاړه اخلي.
هغه خلکو ته په خطاب کې ویلي: ((د امنیتي تړون تطبیق به د دغه پروګرام بوه برخه وي. په کابل کې د لاس د ورغوي په څېر بلد یم... تاسو ډاډه اوسئ، د غلو، اوباشو، د خلکو ځوروونکو، باج اخیستونکو، له قانونه سرغړوونکو، د خلکو او عامه ځمکو د غصب کوونکو، تکراري مجرمانو چې تر پوښښ لاندې فعالیت لري او هغه زورواکو چې په ښکاره قانون خوښوي، د ټولو نوملړ له مخکې ترتیب شوی دی.))
د ولسي جرګې په نننۍ ناسته کې صالح ته د امنیت سپارلو پر موضوع خبرې وشوې.
په ولسي جرګه کې د میدان وردګو د خلکو استازي مهدي راسخ وویل: ((د حکومت دغه تصمیم ښيي چې د کورنیو چارو وزیر او د ملي امنیت رییس بې کفایته دي، که دوی د مدیریت توان نه لري ښه دا ده چې له دندو لرې شي.))
په دې جرګه کې د فراه د خلکو استازې بلقیس روشن وویل: ((ارګ مېشتو ته ننګ او شرم دی چې د ولسمشر لومړی مرستیال د کابل د امنیت مسوول ټاکي.))
دغه راز په ولسي جرګه کې د کاپیسا د خلکو استازي محمد اقبال کوهستاني د ولسمشر له خوا د ولسوالیو لپاره ۱۰۰ امنیه قوماندانانو ته په اشاره وویل، یاد کسان د افسرانو ذاتي قانون خلاف پر دندو ګومارل شوي دي.
نوموړي دغه ګومارنې سلیقوي وبللې او ویې ویل، ډېری هغه کسان چې د امنیه قوماندانانو په توګه ګومارل شوي د جنګ او مدیریت وړتیا نه لري.
دغه ۱۰۰ قوماندانان په وروستیو دوو ورځو کې ټاکل شوي دي.
د دې جرګې ځينو نورو غړو د ولسمشر لومړي مرستیال ته د امنیت پر سپارلو او ولسوالیو ته د ۱۰۰ تازه امنیه قوماندانانو پر ټاکلو نیوکه وکړه، خو یو شمېر نورو بیا صالح ته د امنیت له سپارلو ملاتړ وکړ.
په دې جرګه د کونړ د خلکو استازې وږمې صافۍ ځینو نورو وکیلانو وویل، د ولسمشر لومړی مرستیال په امنیتي برخه کې کافي تجربه لري او باید ټول د حکومت له یاد تصمیم څخه ملاتړ وکړي؛ ځکه د کابل ښار امنیتي وضعیت د اندېښنې وړ دی.
login or register a new account.
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن