بلخ کې د روغتون لپاره د ۲.۱ میلیون افغانیو امبولانس په ۶.۸ میلیونه پیرل شوی

کابل (پژواک، ۲۱ لړم ۹۹): په بلخ کې روغتونونو ته ۵۱ قلمه توکي په ټولیز ډول ۱۷ میلیونه افغانۍ په لوړه بیه پیرل شوي او په دې توکو کې د ۳۵زرو یو ماشین په ۴۳۸ زره او د ۲.۱ میلیون افغانیو امبولانس په ۶.۸ میلیونه پیرل شوي دي.

دغه توکي تېر کال د تلې او لیندۍ په میاشتو کې د بلخ په مرکز کې په نشه یي توکو د روږدو ښځو او ماشومانو دوه روغتونونو او دغه راز د بلخ په مارمل ولسوالۍ کې د دولتي روغتیایي کلینیک لپاره د بام دنیا د لوژستیکي شرکت لخوا پيرل شوي دي.

پژواک خبري اژانس ته د یادو توکو د پیر په لاس ورغلو جدولونو کاپیانې – چې د بلخ د عامې روغتیا رياست پخواني مشر ډاکټر نصیر احمد دراني او موظف پلاوي لاسلیک کړي، ښیي چې توکي د بازار له نرخ څخه په لوړه بیه پیرل شوي دي.

له یادو توکو څخه ۴۷ قلمه په نشه یي توکو د روږدو ښځو او ماشومانو دوو روغتونونو او ۱۲ قلمه نور د بلخ په مارمل ولسوالۍ کې دولتي روغتیایي کلینیک ته پېرل شوي دي.

پژواک له یادو۵۹ قلمه توکو څخه د ۵۱ قلمه توکو نرخونه له بازاره اخيستي، خو د پاتې ۸ قلمه بیې یې ځکه نه دي اخیستې چې په جدولونو کې یې ځانګړتیاوې سمې څرګندې نه دي.

د بیو پرتله ییز جدول:

بلخ کې درېیو روغتیايي مرکزونو ته د توکو د پیر او بازار د نرخ بیې
د بیو توپیر څومره دی؟	د توکو د بازار نرخ	د توکو د پیر بیه	د توکو تشریح	ګڼه
13	35000	438300	د الکټروکارګرافي ماشین	1
10	500	5000	انتظار څوکۍ	2
7	850	6000	دیوالي غټ ساعت	3
6	800	5000	یو کسیزه اسفنجي توشکه	4
6	1767	10000	برېښنايي جارو	5
6	900	5000	کوډبند	6
5	1600	8000	ګرین بورډ	7
4	9000	40000	یو عشاریه شپیته سانتي متره د تحریر میز	8
4	4500	20000	یو عشاریه څلوېښت سانتي متر د تحریر میز	9
4	4500	20000	د ډوډۍ خوړلو لوښو سیټ	10
4	3400	15000	یو کسیزه د خوب تخت	11
4	2700	11300	د ملټي میډیا پروجګټور پرده	12
4	5500	20000	د کالیو المارۍ ۲/۸۰	13
3	4400	15000	درې کسیزه فلزي څوکۍ	14
3	30000	100000	د ملټي میډیا پروجګټور	15
3	400000	1291000	۱۰۰ ملي اکسري ماشین	16
3	2156000	6800000	د ټویوټا هایس معیاري امبولانس ۲۰۱۴- ۲۰۱۶	17
3	1600	5000	وایټ بورډ	18
3	32350	100000	ایر کنډېشن ۱۸۰۰۰ BTU	19
3	120000	360000	د برېښنايي شاک ماشین	20
3	1700	5000	د اور ضد ډبه	21
3	350	1000	يو کسیزه ډبل وطني بالښت	22
3	350	1000	د تخت پاسنۍ وطني ټوټه	23
3	11200	30000	درې کاره ۱۳۰ ایچ پي پرینټر	24
3	1848000	4822000	د ایکوکارګرافي ماشین	25
3	42500	110000	لپ ټاپ کمپيوټر	26
3	8000	20000	د اوبو د ډیسپلیسر یخچال له بوتل سره	27
2	4200	10000	د فایلونو دوه پله يي لرګینه المارۍ ۲/۸۰	28
2	43000	100000	ډیسک ټاپ کمپيوټر	29
2	2200	5000	چرمي بازو لرونکې ثابته څوکۍ	30
2	8800	20000	د کالیو وینځلو او وچولو د منځنۍ کچې ماشین	31
2	45000	100000	د غونډې شپږ متره میز	32
2	9200	20000	۳۲ اینچه سونی چنايي تلوېزیون	33
2	205000	440000	مایکرولب ماشین	34
2	2800	6000	نکلي یو کسیزه چنايي څرخي څوکۍ	35
2	24500	50000	۷ کسیز چرمي کوچ له وطني میز سره	36
2	2450	5000	غټه باطله داني	37
2	500	1000	پلاستیکي څوکۍ په مختلفو رنګونو	38
2	14000	28000	د سکشن دوه مرتبانه لوی ماشین	39
2	61600	120000	د فوټو کاپي ماشین	40
2	3150	6000	د درملو دوه پله يي فلزي المارۍ ۲/۸۰	41
2	577500	1100000	۲۰۰ ملي چنايي اکسري ماشین	42
2	45000	80000	د فوتوترابي ماشین	43
2	8500	15000	برېښنايي او ګازي ترکي بخارۍ د ګاز له ۱۰ کیلویي ډبې سره	44
2	423500	700000	د بي هوښۍ انستیزي ماشین	45
1	3400	5000	د ګاز درې خانه یي منقل	46
1	3600	5000	برېښنايي ۵ لیټره چای جوشي ترموز ډوله	47
1	11500	15000	۱۲۰۰ واټه یو پي ایس	48
1	4500	5000	د چای څښلو لوښو سیټ	49
1	21000	20000	د وښو رېبدلو ماشین	50
1	4000	2000	چارجي ګروپ	51

د حکومت له خوا د پیرل شویو توکو مجموعه  په افغانۍ	27,173,900
د بازار نرخ له مخې د توکو مجموعه په افغانۍ	10,100,836
توپیر	17,073,064

پژوک ته د یادو توکو نرخونه په کابل کې د وحیدالله فرنېچر پلورنځي، ډیګ کام کمپيوټر پلورنځي، عبدالقهار عظیمي سوداګریز شرکت، نېشنل قرطاسیه پلورنځي، انار درګي لېمټيډ شرکت، اسیافارما، ‌ذینان اباسین لمیټډ او نور فارما طبي شرکتونو ورکړي دي.

په بلخ کې د پژواک خبریال هڅه وکړه چې د مارمل ولسوالۍ روغتون له چارواکو سره هم خبرې وکړي، خو اړیکه ورسره ټینګه نه شوه.

پژواک د لړم په ۱۲مه د بلخ د روغتیا ریاست له پخواني رییس نصیر احمد دراني سره اړیکه ټینګه کړه او د یادو توکو په لوړه بیه د پېر موضوع یې ورسره شریکه کړه.

هغه وویل چې د یادو پروژو وړاندیزونه، د روغتیا وزارت موافقه، له مالیې وزارت څخه د بودیجي منظوري او د پروژو اعلان د ده له کاري دورې مخکې شوي او ده یوازې شرکتونو ته د پیسو د ورکړې غوښتنه کړې ده.

دی وايي:”دغه دوسیه د روغتیا وزارت تفتیش ته هم تللې ده، هغوی ارزولې ده، په نرخونو کې توپیر نشته؛ په اسنادو، اجناسو او کيفیت کې یې هم توپیر نشته؛ ځکه د معاینې او پېرېدنې پلاوي کتلي دي، نرخونه د وخت له نرخونو سره مناسب شوي دي.”

خو د بلخ د عامې روغتيا ریاست اوسنی مشر ډاکټر خليل حکمتي وایي، د یادو توکو د پیر تړونونه هغه مهال شوي چې دی د ریاست مشر نه و، خو که د بیو په اړه یې شکونه موجود وي او يا هم په کې د فساد تورونه وي، نو دی د دې پلوی دی چې يو درېیمګړی پلاوی دې وټاکل شي، دغه تړونونه دې وارزوي او په فساد کې ښکېلو کسانو سره دې قانوني چلند وشي.

خو حکمتي زیاتوي:” قراردادي شرکتونه مکلف دي چې دولت ته ماليه او ټکس ورکړي؛ له همدې امله په ځينو مواردو کې دوی ته اجازه شته، چې يو توکی د بازار له نرخه ۲۵ سلنه په لوړه بیه دولت ته ورکړي؛ خو که کوم توکي له دې څخه لوړ اخيستل شوي وي، نو بيا دا سمه نه ده.”

د یو کال په تېرېدو سره ۷ ډوله وسایل روغتون ته نه دي رسول شوي:

په بلخ کې د نشه یی توکو د روږدو کسانو د روغتونونو رييس ډاکټر عصمت الله کريمي د لړم په ۱۱مه پژواک ته وويل چې د دغه ولایت د ماشومانو او ښځینو معتادینو روغتونونو ته له یادو پیرل شویو توکو تر اوسه ۷ قلمه نه دي سپارل شوي.

دی وايي:”يو پايه د کنفرانسونو شپږ متری مېز، پنځه پايې د خوب يو کسیزه وطني تختونه، پنځه تختې يو کسیزه وطني سر تختي، ۲۱۰ متر مربع پردې او د هغې اړوند توکي لکه راډ او نور اړوند توکي، درې پايې ګازي اور ډبې، ۴ سيټه د ډوډۍ خوړلو لوښي او ۴ سېټه د چای څښلو لوښي نه دي راکړل شوي.”

هغه زیاته کړه، د دوی د معلوماتو له مخې کوم توکي چې دوی ته نه دي ورکړل شوي هغه د روغتیا ریاست په زېرمتون کې دي او سره له دې چې څو ځله یې غوښتنه کړې خو روغتونونو ته نه ورکړل شوي.

د بلخ د عامې روغتیا رييس ډاکټر خليل حکمتي د بلخ معتادينو روغتون د هغو ۷ قلمه توکو په اړه چې لا هم ياد روغتون ته نه دي رسېدلي وويل، چې دغه توکي په زېرمتون کې شته او له ده څخه چا د توکو د ورکړې غوښتنه نه ده کړې، خو که د معتادینو روغتون چارواکي یې غوښتنه وکړي، دی به یې ورته وسپاري.

د بام دنیا لوژستیکي شرکت مالک څوک دی؟

د سوداګرۍ او صنعت وزارت یوې رسمي سرچینې پژواک ته وویل چې د دغه شرکت رییس توریالی د سلطان محمد زوی او مرستیال یې ننګیالی د توریالی ورور دی او د جواز ګڼه یې  D41802 ده.

د شرکت رییس توریالي وویل چې پورتني توکي یې د بازار له نرخ سره برابر اخیستی دي او کوم توپیر نه لري.

ده د امبولانس په اړه وویل چې د بلخ ولایت مارمل روغتون لپاره یې داسې امبولانس پېرلی چې صفر کیلیومټر دی او امبولانس دننه په طبي تجهیزاتو هم سمبال دی.

د عامې روغتیا وزارت یوې باوري سرچينې پژواک وویل چې د دغه شرکت په لوړه بیه پیرل شوي توکو دوسیه د وزارت د داخلي تفتیش د څيړنې لاندې ده.

پژواک دغه موضوع ۸ ورځې مخکې (د لړم په ۱۳مه) د افغانستان د عامې روغتیا وزارت له مطبوعاتي دفتر سره شریکه کړه، خو تر اوسه یې ځواب نه دی ورکړی.

پژواک د  ملګرو ملتونو پراختيايي پروګرام (UNDP) په مالي مرسته دا راپور برابر کړی دی.

Visits: 6