شبرغان (پژواک، ٢١ لړم ٩٩): په جوزجان کې سیمه ییزې سرچینې وایي چې د فیض اباد ولسوالۍ په حیدراباد کلي کې پر ملکي وګړو د ناپېژاندو وسله والو په ډزو کې د دغه کلي د پراختیایي شورا د رییس په ګډون درې کسان وژل شوي دي.
د جوزجان ولایت د فیض اباد ولسوال الف شاه پژواک خبري اژانس ته وویل چې دغه درې کسان هغه مهال د برید هدف وګرځول شول چې تېر ماښام د لمانځه له ادا کولو وروسته د خپلو کورونو پر لور روان وو.
د هغه په وینا، په وژل شوو کسانو کې چې ټول ملکیان دي، د دغه کلي د انکشافي شورا رییس شهرالله هم شامل دی.
هغه وویل چې د پېښې لامل تر اوسه نه دی څرګند شوی، خو د طالبانو تر واک لاندې سیمه کې رامنځته شوې ده.
خو د جوزجان د امنیې قوماندانۍ د امینت امر مل پاسوال شاه اغا ادعا کوي چې د حیدراباد د کلي د انکشافي شورا رییس شهرالله مخکې یو جهادي قوماندان و او هغه طالبان وژلي دي.
هغه وویل: «اوس طالبان هڅه کوي څو قومي مخور او نفوذ لرونکي کسان، د تروریستي عملیاتو ترسره کولو له لارې ووژني.»
په همدې حال ملي دفاع وزارت هم د اعلامیې په خپرولو سره ویلي چې پر ملکي وګړو د طالبانو په برید کې درې کسان وژل شوي دي.
سرچینې لیکلي چې وژل شوي خلک داسې کسان وو چې د ماښام لمانځه له ادا کولو وروسته د خپلو کورونو خوا ته روان وو.
طالبانو تر اوسه په دې اړه څه نه دي ویلي.
login or register a new account.
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن