هرات ښار (پژواک، ٢٦ لړم ٩٩): د هرات – اسلام کلا پر لويه لاره د يوې چاودنې له امله د اورګاډي پټلۍ اووه تنه ساتونکي ټپيان شوي دي.
د هرات د والي وياند جيلاني فرهاد د لړم په ٢٦مه، پژواک خبري اژانس ته وويل چې دا چاودنه نن تر غرمې مخکې د عامه ساتې د ملي تصدۍ د ساتونکو پر رنجر موټر شوې ده.
هغه زياته کړه، چې په دې چاودنه کې اووه ساتونکي ټپيان شوي چې نږدې روغتون ته وړل شوي، خو د هغوى د روغتيايي حالت په اړه يې معلومات نه درلودل.
فرهاد وويل، چې په ياده سيمه کې يو بل ماين هم کشف او شنډ کړل شوى دى.
بلخوا د عامه ساتنې ملي تصدۍ وياند ضياء ودان بيا وايي چې د دوى پر ساتونکو هلته دوه چاودنې شوې دي.
هغه پژواک ته وويل، چې په دې چاودنو کې يې اووه ساتونکي ټپيان شوي چې اوسمهال په روغتون کې تر درملنې لاندې دي.
ودان د ټپيانو روغتيايي حالت د ډاډ وړ وباله.
ده زياته کړه:(( زموږ ساتونکي ملي پروژې او عامه شتمنۍ ساتي، بايد پرې څوک غرض ونه لري.)
هغه وايي، د محافظت عامې پرسونل باندې بريد د افغانستان له اوبو، لاجوردو او خلکو سره د مستقيمې او سختې دښمنۍ په مانا دی.
د يادونې ده، چې د هرات او ايران ترمنځ د اورګاډي پټلۍ يوه برخه جوړه شوې او پر نورو برخو يې کار روان دى.
Views: 0
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن