جلال اباد، کابل (پژواک ٢٧ ورى ٩١): د کرکټ د ولايتي سياليو په لړ کې ننګرهار، بلخ او د کابل ولايت لوبډلې تخار ته ماتې ورکړه.
د کوچيانو د لوبډلې په ګډون د ٢٠ ولايتونو د لوبډلو د کرکټ ولايتي سيالۍ، اوس مهال په ننګرهار او کابل کې روانې دي.
نن د ننګرهار ولايت په غازي امان الله خان لوبغالي کې د ننګرهار او بلخ ولايتونو ترمنځ د کرکټ يوه ورځنۍ لوبه ترسره شوه.
د ننګرهار د سياليو يوه سمبالوونکي عبيدالله پژواک خبري اژانس ته وويل، چې د بلخ لوبډلې لومړۍ لوبه وکړه او په ٤٧ اورونو کې يې ٢١٣ مندې جوړې کړې او ننګرهار ته يې د ٢١٤ منډو هدف وټاکه.
هغه زياته کړه چې د ننګرهار له لوري فريد ملک او احمد شاه درې درې، نسيم قصاب دوه، باطن شاه او کامران يو يو لوبغاړى وسوځول.
د عبيد په وينا، د ننګرهار لوبډلې دغه هدف په ډېرې اسانۍ سره په درې څلوېښتم اور کې د درېيو لوبغاړو په سوځېدو ترلاسه کړ او لوبه يې وګټله.
دى وايي، چې د ننګرهار له لوري لعل شاه ډېره ښه لوبه وکړه او سل منډې يې جوړې کړې، دغه راز احمدشاه هم پنځوس منـډې جوړې کړې.
لعل شاه د دې لوبې غوره لوبغاړى اعلان شو.
دغه راز نن دويمه لوبه د کابل ښار د کرکټ په نړيوال لوبغالي کې د کابل او تخار لوبډلو ترمنځ ترسره شوه، چې د کابل په بريا پاى ته ورسېده.
د کابل لوبډلې روزونکي حاجي عزيزالله پژواک اژانس ته وويل، چې د کابل لوبډلې په ٤٨ اورونو کې د لسو لوبغاړو په سوځېدو ٢٠٩ منډې جوړې کړې.
د هغه په وينا، ميرويس ځاځي ٤٠ او محمد ٣٤ منډې جوړې کړې او تخار له لوري يحيى د کابل درې لوبغاړي وسوځول.
نوموړى وايي، چې د تخار لوبډله په ٢٨ اورونو کې په ١١٠ منډو وسوځېدله او لوبه د کابل په بريا پاى ته ورسېده.
د کابل له لوري محمود او قادر څلور څلور لوبغاړي وسوځول.
محمود د دې لوبې غوره لوبغاړى اعلان شو.
Visits: 2
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن