غزني ښار(پژواک٢١تله٩١) : د غزني د مرکز اړوند د” خاک غريبان” په سيمه کې د نښتې له امله يوښځه ووژل شوه او پنځه ښځې او درې ماشومان ټپيان شول.
د غزني مرستيال والي محمد علي احمدي پژواک خبري اژانس ته وويل ، چې نن له غرمې وروسته وسلوالو طالبانو د غزني د مرکز اړوند د “خاک غريبان” په سيمه کې پر يوې امنيتي پوستې بريد وکړ.
د هغه په وينا، په دې بريد کې د وسلوالو طالبانو په ډزو کې ٩ عام وګړي ټپيان شول ، چې شپږ يې ښځې او درې يې ماشومان دي .
د والي مرستيال زياته کړه ، چې په ياد بريد کې افغان ځواکونو ته هم مرګ ژوبله اوښتې ، خو په اړه يې کره معلومات نه لري .
د غزني د عامې روغتيا مشر بازمحمد همت وايي ، چې نن له غرمې وروسته له يادې سيمې څخه شپږ ټپي ښځې او درې ټپي ماشومان ، د غزني روغتون ته وړل شوي دي .
دده په وينا، له ټپيانو څخه يوې ښځې په روغتون کې ساه ورکړه او يوه بله ټپي شوې ښځه چې روغتيايي حالت يې د اندېښنې وړ و ، د درملنې لپاره کابل ته لېږدول شوې ده .
د سيمي يو تن اوسېدونکي محمد رضا هم ياده مرګ ژوبله تاييد کړه.
ده وويل،چې نن ماسپښين وسلوالو طالبانو د دوى د کلي پر پوستې بريد وکړ او يادو کسانو ته په نښته کې د دواړو لوريو په ډزو مرګ ژوبله اوښتې ده .
وسلوالو طالبانو تر اوسه په دې اړه څه نه دي ويلي .
Visits: 0
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن